الوكاد . معرض الكتاب . شي حلو بالحياة . ناس تستفيد إطلاعاً ومعرفه وناس تُنمّي الذهن والثقافة والمعرفة .
يكفي أن الوضع يتغيّر شوي . خاصة مع التطور التكنولوجي الحالي . نت وسيديهات وقراءة إلكترونيه . ومع ذلك الإقبال بصراحه حلو ويلاحظ الحاضر للمعرض أن التوجّه للكُتُب شي مميز . خصوصاً مع حضور الصغير والكبير . الذكر والأنثى ، بشتى الطبقات والأفكـار .

الموضوع هذا تقرير مُبسّط . منبطح على جنبه الأيمن من دون تفصيل وزيادة شرح .
الصور تحكي من طأطأ لعزّ الله مقامك ،

بدايةً . كانت الفكرة أني اشخط لمعرض الكتاب مع كم حبّه آدميه . شايلن همّ الحريم . اقول بنفسي . ياربيييه ياذا الحريم . كني بهم مثل العام حاشرين عمارهم بين الرجاجيل وكل وحدتن مظهرتن ذراعها ذاك اللي كنّه مكنسة كهرب وقاعدتن تقرا رواية .
عاد ربي هالسنة راحمني . وطحت في يوم كله اشناب وثيابن بيض .
وماللحريم شوفه . بل والله إنني ياجماعه قاعدن اشوفهم متكدسين برا يحترون رجاجيلهم اللي جابوهم وبلشو فيهم هههههههههههههه

هذا طريقنا وممشانا .
طريق الملك فهد . اللي مايعرفه . يسأل أي موظف حكومي ساكنن بالبديعة ويداوم بتحلية المياة أو ساكنن بالسليمانية ويداوم في وزارة العدل .



وصلنا للمعرض واللي اخبره ان معرض الكتاب طبعاً بيكون في نفس مكانه العام الماضي . ويوم وصلنا لمواقف المعرض إلى المواقف فاضيه والبيبان مسكّره والمطبّات نايمه والشويرعات مافيها قرطاستن طايحه





ياولد . ويني انا فيه واقلب عويناتي غديني اشوف احد اسأله .
بس ماش . ماحولي احدن صاحي

ويلهمني الله وتولّع فوق راسي لمبه حمرا . واتذكر ان معنا لاب توب واتصال نت ،
قلت مابدهاش . الخريطة الخريطة . عطونا الخريطة نبي نشوف وين هم نقلو له

وافتح الجهاز واشبك المشبك وعلى اقرب موقعن طارف .
وتطلع لنا الخريطة



باللهِ ذا وصف ؟
ودي اعرف من هاللي مسوي الكروكي واشق بطنه بسكين خضره

اعنبو بليسه احسّه راسمن الكروكي وهو يهوجس باندنوسيا !
أنا ياللي ساكنن بالرياض ماقد سمعت بهالشوراع

المهم ونمشي شوي ويوم انقلبت روسنا ودرينا ان راعي الكروكي مهوب لمّ علم وانا اللي أدق على صديقي الصدوق محمد .
وين البتاع فيه . خبري بك رايحن له يالسمرمدي قبل يومين .
ووصف لي الطريق لين عرفنا الحاقه الصعبه اللي اسمها " معرض الكتاب " !

ويوم وصلنا المعرض كننا واصلين منى وبعد ساعة بيطلعون الحجّاج لعرفة عشان يوقّفون هناك !
اللي طامرن بسيارته على الرصيف واللي معترض الشارع كن الشارع باسم ابوه . اشكال وانواع . ويقولون ورى المرور شادّن علينا . بلاهم والله لاقين ناسن صخل مثلكم مطلعين الرخصه بواسطه وراكبين على المرتبه وحاطين تحتهم كرتون بردقان عشان يطولون الدركسون !





هذا راعي بنده جاين يشوف وش السالفه يحسب فيه حادث

وانا اللي احشر عمري بين هالناس .
دايم وصية ابوي لي : لاتستحي من الناس وخل وجهك يابس كنه عمارة عظم عليها لوحة البنك العقاري ، وادخل بينهم وخذ حقك ولايلعبون عليك .
خمس وصايا تكتب بماء قرايه . خذوها عن مدمن عن أبيه عن جدّه .

وقّفنا في أقرب مزرق . ونزلنا مدرعمين مع خلق الله .
مارحمت إلا اللي ماسكن يده مرته ورايحين للمعرض قبل يوصلون للباب الرئيسي وبينصدمون ان الزيارة ذاك اليوم بس للرياجيل ! . وكني به يسولف على مرته انهم بيتمشون شوي وإذا تعبو بيروحون يشربون كبتشينو هههههههههههههه يااافرحه ماتمت

عاد شوفو الناس هنا بمدخل المعرض مع البوابه الرئيسيه



هنا الإستعلامات



آلحين من كبر هالمعرض مسوين له إستعلامات .
فسقه يادافع البلا

وكل اللي رايحين لهم بس يبون يجمّعون اوراق عشان يحسسون اهلهم انهم طلعو بفايدة من المعرض

على ذا العربيات كنك داخلن جيان

وقمنا نحومي في المعرض وخذنا جوله عليه . ماخلينا داعوس إلا دعسنا خشومنا فيه ، ومافيه ممر إلا وشفناه ، ومافيه معرض إلا وقمنا نقلّب الكتب اللي صافينها عندهم .

كومة صور . تشخلعو فيها وتمقلو فيها زين





يالبى نظرات هالهندي . حسستني اني قاعدن ازرع لغم في المعرض



الوزارات . أشكال والوان ،
الشي الغريب أن كل وزارة تبي يصير شكل معرضها أحلى . ماعاد باقي إلا يسرمكون المدخل !







وكل مابغيت شي طلّعت كروكي المعرض وجلست اتمقّله زين





عاد جاتكم الدور . كل وحدتن تقول الزين عندي .
وكل واحدن جالسن فيها مطلّعن دفتر الفواتير قبل يقول اقلطو . اعنبو بليسكم مير ماستحيتو منا



متابعين قصّة الغراب والثعلب



هذا شافني اصوّر وشخّص وجلس على الكرسي ياحبني له
بغيت ادوّر لي جدار عليه صورة شجره والا شي واخليه يوقف واخلي خلفيته تطلع شي

















مكتب الهيعه على قولة عمتي هيا
يالبى صحون الفطاير اللي تحت الطاوله بس





عاد أذّن علينا المغرب وقامت الهيئة تنبّه الناس يسكّرون ويوقفون بيع . اللي مهوب يمّهم واللي قام يتنافض كن في مخباه هروين واللي هزّ رويسه وراح يتوضّى .
رحت اتوضى وقلت في نفسي دام هذا معرضهم يلقّ وش زينه ووسيع ومن زود فسقتهم فارشين ارضيتهم شكل الدورات شي ومن زينها ود الواحد يجيب مرقده في ماطاها ويتقلّب في برادها .
عاد شفت بعيني المصيبة ولعل هالشي يحسب سلبيه في عرض هالمعرض ولزوم السنة الجايه يشوفون لهم حل . ياأنهم مايخلونّا نصلي ويشيلون ذنبنا والا يوسّعون دوراتهم ويخلون عنهم الضيق الله يضيق على الظالم .
وخذ يازحمه ،،



المصري انواع حومة التسبد



قال الإمام : اللهُ أكبر .
ومادريت إلا هالصفّ اللي شاطفني على اليمين يقول صفّ معنا



ويوم صلينا كننا بسطوح الحرم . كل واحدن ديور وعطا اللي وراه ظهره وخذ ياسوالف ،
انه والله من هالمشي في هالاسياب مهوب من حبّن للسوالف





دارة الملك عبدالعزيز ذيك التُراثيه حاضره . ودّك تودي امك لها تتفرج عليها لين تشبع



آلحين وش هالحركه البايخه اللي يسوونها لين لقو واحد وضعه غريب . كلهم يتفرجون عليه كنّه مسوي بلا
شوفو بس ابو غتره بيضا وهو يطلّ عليه من ورى



ونكمّل صويرات عن المعرض ..



يالبى اللي يتبوسم ورى











ترى العامل ماتعب وهو يدفّ العربيات















الكتب مرصوصه رصّ كنها كراتين تمر خلاص توهم كانزينه .



الشويّب يتفرج على الصور . شكله مهوب يعرف يقرا .



من زود الشفاحه واقفين يقرون ماقدرو يمشون للمحاسب



حركات يالنظاره اللي يمزعون بها فوق ليمنهم بغو يقرون زين







يالبى البزراين بعد . كل ماشفت لي بزر صدّيت به وسولفت معه .
واحد من البزارين يقول لي : آلحين انت ورى ماتشتري كُتُب . بس جالس تصوّرنا .
قلت بنفسي : عسى مهوب حلال ابوك بعد هاللي داخله انا











وابلشني واحدن بعد معه عياله يقول صوّر عيالي . المشكلة عياله شيووووون الله يخليهم له
والكام كنها بعد بدت تتملي صور وصار وضعي مُش ولابُد . عاد صرفته قلت ان شالله باجي باتسر واصوّرك انت وياهم ، ابيه يطسّ عن وجهي هو وهالذرّ اللي معه .

ضيف الشرف هالسنه بالمعرض كانت دولة السنغال ،،



السنقالي مسوي ثقيل والا هو عينه علي وانا اصوّر



والحلوه " عُمان " كانت حاضره ..



المعرض مثل كل سنة . مريّحين الواحد وراكزين في كل زاوية جهاز حاسب عشان اللي يبي يستعلم عن كتاب والا اي حاقه حلوه



والإستعلامات بعد موجوده عشان السبايك اللي يضيّعون



ومازال الشقل جارياً ..



ونرجع للبزراين والطماله ووجع الراس

جناح الطفل هذا بغيت ادخله بس كرشوني الأمن يقولون مافيه إلا حريم وبزارين يلعبون ،





لا وحاطين ذيك الشاشه الكبيره وتنقل القناة الثقافية



وإذا شفت لك شيبان مجتمعين فاعرف انهم يقرون جريدة الجزيرة



وهنا عاد البوفيه .
فيه ناس من دخلت وهي جالسه تاكل . طلعت وهم مابعد قضو يالله الخيره ،
مدري من هاللي لاعبن عليهم وقايلن لهم ان معرض الكتاب أحسن مافيه بوفيّته ،



سرى واصلن مخرج 13
كل ذا عشان قطعة لحمه وسندويش ناشفه ،،



وهذي بوفيتن ثانيه بعد .
المعرض السنة الجايه شكل البوفيات بتصير اكثر من المعارض



معرض مكتبة العبيكان صايرن كنه سمبوسة غوّار برمضان من كثر الزحمه يالله انك تزيده ولاتنقصه













العروض في كل مكان . والهلس والتسذب بعد بتلاقيه في كل مكان !



لقيت الدكتور الحمادي
عطاني نسخه من كتابه وشبّكني وشبّكته وقال عطني رقم جوالك وعطيتهياه .

هذي خشيشته وهو ملمّعن ام النظاره ويقرا كتابي



يالبى البوهه بعد

وهنا إهدائه لي ،



ياحوبني لك وانت ماتعرف إلا الشهور العفرنجيه

وهنا الدكتور محمد الهاشمي . راعي المقاشر والملاجد على قناة المستقله
جاه الكتاب ببلاش . وفّر الـ 17 ريال في مخباك يادكتور . فداك ياحوبي





وراعين اشكال وانواع . ومن الحب ماقتل









يوم ان عظامي ارتخت واحسّ مفاصلي صارن كما مقصّ شعر شغاله اندنوسيه . قلت ياولد مابدهاش . ازرق للبوفيه اللي برا وخل عنك المخنز اللي داخل .
نفاه وبراد وشغلهم اذرب

ياليل السكورتي وهو يترزز



هالبنقالي حقنه . اقول وخّر ابي اصوّر وجالسن قدّامي . كنه الفريان بس معه إقامه خضرا





اوما هالكاس الاحمر . احسّ لو اشرب فيه بيطلع على بريطماتي روج



يالبى الخشّه ياناس
هذا موظف دكتور كيف . قلت تعرف كواليس . قال اصلاً ماعرف شلون يشغلون الجهاز





حتى هل الشرق يحبونه



وطلعنا مع الباب وقرضنا من المقسوم ،
وخذت لي كاس كبتشينو كبري سبع مرات ماشالله
بس ترى أقبح شي بالحياة انك تاخذ لك كبتشينو وتنسى تاخذ لك معلقه ويصير مشوارك عن البوفيه بعيد
عاد انشب شلون تحرّك السكر . ماتحسّ بالطعم إلا لين بديت تخلص منه



قحشي من المعرض وورى الصورة شيّن اتسود ،



.

.

بكذا قضينا من التقرير .
ان شالله يصير ثقيل عليكم ويحوّم تسبودكم . وهذا أهم شي بالنسبه لي

أحلى شي بالمعرض أنك تطلع بشي تستفيد منه . كتاب او مخطوطه او معلومة ثقافية .

ان شالله السنة الجاية والا اللي بعدها أصير قد نزلت جزئي الثاني واصير اوقع على جبهة كل آدمي وآدميه يجون عندي ،
فوتكو بعافية . وسلموني على اللي حولكم